Presidentja e Kosovës, Vjosa Osmani ka bërë të ditur se të martën ka zhvilluar një takim me Odën Ekonomike të Letonisë, ku ka prezantuar potencialin që ofron Kosova për investitorët e huaj.
Osmani ka theksuar se Kosova është e hapur për të ndërtuar ura të reja partneriteti me Letoninë, ndërsa sipas saj bashkëpunimi ekonomik mbetet ndër prioritetet kryesore.
“Në takimin me Odën Ekonomike të Letonisë, prezantova potencialin që ofron Kosova për investitorët e huaj: qasje të lirë në disa tregje ndërkombëtare, një klimë që bazohet në sundimin e ligjit dhe inovacion, fuqi punëtore të re dhe të kualifikuar, e legjislacion në përputhje të plotë me standardet evropiane. Jemi të hapur për të ndërtuar ura të reja partneriteti me Letoninë, ndërsa bashkëpunimi ekonomik mbetet ndër prioritetet kryesore”, ka shkruar ajo në Facebook.
