Presidentja e Kosovës, Vjosa Osmani në kuadër të edicionit të dytë të Forumit për Gratë, Paqen dhe Sigurinë sot ka pritur në takim Kryetaren e Kuvendit të Shqipërisë, Lindita Nikolla.
Sipas postimit të presidencës, Osmani tha se avancimi i interesave të Kosovës dhe Shqipërisë, si dhe rritja e koordinimit në fushën e politikës së jashtme janë në interesin reciprok të të dy shteteve.
“Suksesi i Kosovës është edhe i Shqipërisë dhe anasjelltas. Shqipëria për Kosovën është jo vetëm shtet vëllazëror, por edhe një partnere strategjike në rrugëtimin evropian. Siç e kemi pasur mbështetjen në shumë etapa historike të lirisë dhe shtet ndërtimit, jemi të sigurt që shteti shqiptar do të jetë në mbështetje tonën kudo ku kemi nevojë”, ka theksuar Osmani.
Më tej, Osmani në takim me kryeparlamentaren Nikolla, diskutuan dhe për mundësitë e rritjes së bashkëpunimit ndërmjet organeve legjislative të shteteve si dhe shkëmbimit të përvojave.
Ndryshe, presidentja ka falënderuar përfaqësuesit e Shqipërisë në KiE, duke theksuar se pret që Shqipëria ta bëjë të njëjtën gjë nesër në procesin e votimit në Asamblenë e Përgjithshme të Këshillit të Evropës./teve1.info/
