Presidentja e Kosovës, Vjosa Osmani, ka përkujtuar ish-presidentin e Kosovës, Ibrahim Rugova me rastin e 80 vjetorit të lindjes së tij.
Osmani ka thënë se ai me besim të pafund në lirinë dhe pavarësinë e popullit kosovar hodhi themelet e një Kosove të pavarur.
Ajo po ashtu ka shtuar se ish-presidenti Rugova i ka frymëzuar brezat për të ecur në rrugën e lirisë, pavarësisë dhe demokracisë.
“Në historinë e shtetit tonë shkëlqen një emër që mishëron guximin, urtësinë dhe ëndrrën tonë për shtet të pavarur – Dr. Ibrahim Rugova, ati ynë themeltar dhe presidenti historik, i cili sot shënon 80 vjetorin e lindjes. Me besim të pafund në paqen, dinjitetin, lirinë dhe pavarësinë e popullit tonë, presidenti Rugova hodhi themelet e një Kosove të pavarur, duke formësuar një trashëgimi të rrënjosur në mençurinë, durimin, qëndrueshnërinë dhe vullnetin e pathyeshëm të një kombi. Me urtësi, me vizionin e një burrshtetasi dhe me shpirtin e një patrioti, presidenti Rugova na bashkoi në momentet tona më të vështira, duke frymëzuar brezat për të ecur në rrugën e lirisë, pavarësisë dhe demokracisë. Rrugë nga e cila asnjëherë nuk do të heqim dorë! Falenderoj skulptorin Gëzim Muriqi që sot dhuroi skulpturën e Presidentetit historik për Presidencën e Republikës së Kosovës”, ka shkruar ajo në Facebook.
Ish-presidenti i Kosovës, Ibrahim Rugova ka lindur më 2 dhjetor 1944 në Cërcë të Istogut, ndërsa ka ndërruar jetë më 21 janar 2006 në Prishtinë./teve1.info/
