Presidentja e Kosovës, Vjosa Osmani, ka pritur në takim presidenten e Komisionit Evropian, Ursula von der Leyen.
Pas takimit, Osmani është deklaruar se ka kërkuar që të largohen masat e vendosura ndaj Kosovës.
“Në takim potencova rëndësinë dhe nevojën e largimit të masave të vendosura ndaj Kosovës. Institucionet tona kanë marrë hapat e nevojshëm për të garantuar zgjedhjeve të reja e të lira, por për fat të keq adresa e këtyre pengesave vazhdon të mbetet në Beograd”, tha presidentja në konferencë pas takimit.
Osmani, ka deklaruar se gjatë takimit kanë diskutuar mbi planin e ri të rritjes së Ballkanit Perëndimor, përmes së cilit sipas saj, synohet integrimi i Kosovës në tregun evropian.
Ajo tha se plani parasheh mbështetjen e Bashkimit Evropian në rritjen e asistencës financiare “për reforma që duhen të merren në procesin integrues”.
“Takimi ynë i sotëm u fokusua te plani i ri i rritjes së Ballkanit Perëndimor të cilën e prezantoi presidentja von der Leyen. Krahas kësaj, kisha mundësinë të informoj presidenten për zhvillimet e fundit në vend dhe angazhimin e çdoditshëm të institucioneve tona për të integruar Kosovën në BE. Plani gjithëpërfshirës i bazuar në katër shtylla shënon hap të rëndësishëm drejt integrimit në tregun e përbashkët evropian. Ndër të tjera, plani parasheh mbështetjen e BE-së nëpërmjet rritjes së asistencës financiare për reforma që duhen të ndërmerren në procesin integrues”, ka thënë Osmani.
Presidentja Osmani ka thënë se Serbia vazhdon të dëshmojë që ka ambicie destabilizuese.
“Vetëm në javën e fundit kemi qenë dëshmitarë të këtyre ambicieve destabilizuese të cilat rezultuar me aktin e agresionit kundër Kosovës më 24 shtator, që u kryen nga grupe paralimitare terroriste të Serbisë. Siç i shpreha edhe presidentes von der Leyen, ne duhet të jemi të bashkuar për të refuzuar dhunën si mjet për arritjen e qëllimeve keqdashëse të cilat minojnë edhe vetë vlerat mbi të cilat është ndërtuar BE-ja”, tha ajo.
Përfund, Osmani ka falënderuar von der Lyen për vizitën e saj në Prishtinë.
“Faleminderit për vizitën tuaj e nderuar presidente, si dhe për përpjekjet, punën, mbështetjen dhe miqësinë tuaj”./teve1.info/
