Presidentja e Kosovës, Vjosa Osmani, ka vizituar Shtabin e Përgjithshëm të FSK-së dhe mori pjesë në “Defender-Europe’23”, ku ka thënë se konfirmon besimin e fuqishëm të partnerëve strategjik me ushtrinë.
Në njoftimin e Zyrës së Presidencës thuhet që Osmani u njoftua nga komandanti gjenerallejtënant Bashkim Jashari me zhvillimet aktuale në FSK dhe aktivitetet në proces.
“Pjesëmarrja e mbi 1300 trupave të FSK-së në stërvitjen fushore “Defender- Europe’23”, përkrah forcave amerikane dhe aleatëve tjerë, si dhe statusi i Republikës së Kosovës në cilësi të vendit pritës, konfirmon besimin e fuqishëm të partnerëve tanë strategjik në profesionalizmin e FSK-së, si dhe besimin në vendin dhe popullin tonë në mbrojtjen e vlerave euroatlantike të lirisë dhe paqes rajonale e globale”, ka thënë presidentja.
Osmani ka shprehur mbështetjen e plotë për zhvillimin dhe avancimin e FSK-së, si dhe mbarëvajtjen e Stërvitjes.
Presidentja ka përgëzuar FSK-në për procesin e suksesshëm të planifikimit dhe përgatitjeve për Stërvitjen “Defender-Europe’23”. /teve1.info/
