Përmes komunikatës, Presidenca ka njoftuar se Osmani do ta përfaqësojë Kosovën në samitin e parë të Komunitetit Politik Evropian.
Ky takim mbledh krerët e 44 shteteve të Evropës ku për qëllim ka nxitjen e dialogut politik si dhe forcimin e bashkëpunimit për t’i adresuar çështjet më urgjente të sigurisë dhe stabilitetit.
“Para liderëve evropianë, Presidentja Osmani do ta përçojë mesazhin e përkushtimit të palëkundur të popullit dhe institucioneve të Republikës së Kosovës për integrimin euroatlantik të Kosovës si garanci për paqe të qëndrueshme në rajon dhe më gjerë. Gjatë takimeve bilaterale, Presidentja Osmani do të diskutojë edhe mbështetjen për anëtarësimin e Kosovës në organizata ndërkombëtare”, thuhet ndër tjerash në komunikatë.
Po ashtu, presidentja do të takojë liderë të ndryshëm evropian për të diskutuar thellimin e bashkëpunimin për të tejkaluar sfidat e përbashkëta.
Komuniteti Politik Evropian është platformë për koordinim politik e krijuar mbi bazën e propozimit të presidenti francez, Emmanuel Macron dhe në të cilën do të bashkohen liderët e 27 vendeve anëtare të Bashkimit Evropian (BE) dhe liderët e 17 vendeve të tjera evropiane./teve1.info/
