Presidentja Vjosa Osmani në fjalimin para Parlamentit Evropian ka thënë se historia e Kosovës është historia e njërzve të saj.
“Historia e vërtetë e Kosovës siç e them gjithmonë është historia e njërzve të saj. Një vend, një demokraci nuk është më e fortë për shkak të një individi apo lideri të caktuar, e as ndonjë reforme të caktuar. Fuqia e një vendi vjen nga forca kolektive e popullit të tij. Historitë individuale të gati 2 milionë njerëzve e bëjnë Kosovën suksesi që është sot”, ka thënë Osmani para deputetëve.
Ajo ka treguar rastin e Vasfije Krasniqit për të cilën ka thënë se duke i rrëfyer përjetimet e saj në luftë, u bë zëri i mijëra të mbijetuarave të dhunës seksuale të luftës së fundit në Kosovë.
“Me mua sot kam një delegacion që është përfaqësimi më i vërtetë i Kosovës. Përfaqëson historinë e saj të rëndë dhe sfiduese por edhe frymën e rezistencës, këmbënguljes që është premtim për një të ardhme më të mirë. Me mua sot është Vasfije Krasniqi-Goodman. Ka qenë vetëm 16-vjeçare kur forcat e Millosheviqit e hoqën nga krahët e nënës së saj, në shtëpinë e saj, për ta çuar në një vend që do të shënonte momentin më të errët, orën më të errët të jetës së saj. Për orë të tëra ajo u mbajt nën kërcënimin e armës e pastaj u përdhunua, e pataj u përdhunua përsëri. Por ishte Vasfija ajo që e kuptoi se plagët vetëm mund të thellohen në heshtje dhe filloi ta ngriste zërin. Kështu e mblodhi gjithë popullin prapa vetes. Ajo jo vetëm që ia kushtoi jetën drejtësisë por sot është zëri i mijëra të mbijetuarave të dhunës seksuale të luftës së fundit në Kosovë”, ka thënë Osmani.
Po ashtu përmendi edhe Fahrije Hotin, për të cilën tha po ashtu se është heroinë e gjallë.
“Është heroinë e vërtetë e gjallë, por në Kosovë kemi heroina të shumta. Është edhe Fahrije Hoti nga fshati Krushë ku gati janë vrarë të gjithë burrat në luftë e shumë mbesin të zhdukur, përfshirë burrin e Fahrijes. Sot Fahrija zotëron kooperativën Krusha e cila u kthye në një vend shprese, tashmë duke eksportuar ajvarin dhe produktet e tjera në të gjithë Evropën. Veprimet e saj jo vetëm që shpëtuan jetën e mijëra grave por frymëzuan edhe filmin “Zgjoi””, tha Osmani.
