Presidentja e Kosovës, Vjosa Osmani ka përkujtuar Nekibe Kelmendin në 14- vjetorin e vdekjes së saj, duke e quajtur zë të qartë për drejtësi në kohët më të errëta të Kosovës.
Osmani ka thënë se ajo përkundër dhembjes personale mbeti stoike dhe nuk hoqi dorë kurrë nga përkushtimi ndaj lirisë, dinjitetit dhe të drejtës.
Ajo ka theksuar se Nekibe Kelmendi ka dhënë kontribut të jashtëzakonshëm në shtetndërtim, në hartimin e Kushtetutës së parë të Republikës, si dhe në shumë procese të tjera shtetformuese.
“Ajo vazhdon të mbetet një ndër figurat më të ndritura të historisë sonë të re. Kujtimi për të do të jetojë gjithmonë si frymëzim për të gjithë ata që besojnë në paqe, drejtësi dhe vlerat mbi të cilat është ndërtuar shteti ynë. Lavdi jetës dhe veprës së saj”, ka shkruar Osmani në Facebook.
