Ish-presidentja e Kosovës, Vjosa Osmani, ka përkujtuar Masakra e Poklekut, duke e cilësuar atë si një dëshmi të qartë të gjenocidit të kryer në Kosovë gjatë luftës.
Përmes një postimi në rrjetin social Facebook, Osmani rikujtoi viktimat e kësaj tragjedie, duke theksuar se shumica e të vrarëve ishin gra dhe fëmijë. Ajo veçoi rastin e Liri Muqollit, një foshnje vetëm 6-muajshe, e cila u vra bashkë me 53 anëtarë të familjes së saj.
“Liri Muqolli ishte 6 muajshe kur, së bashku me 53 anëtarë të familjes, kryesisht fëmijë e gra, u ekzekutuan. Trupat e tyre u dogjën njëherë, pastaj u dogjën sërish. Liri kishte emrin, por lirinë nuk e arriti kurrë,” ka shkruar Osmani.
Ajo shtoi se kushdo që mohon krimet e kryera në Kosovë duhet të vizitojë vende si Pokleku, ku dëshmitë e mizorive janë ende të gjalla. Sipas saj, këto ngjarje përbëjnë prova të pamohueshme të krimeve të luftës dhe akteve gjenocidale.
Në përvjetorin e masakrave në Poklek dhe Çikatovë, Osmani bëri thirrje për kujtesë kolektive dhe drejtësi, duke theksuar se sakrifica e viktimave nuk duhet harruar kurrë.
“Lavdi e përjetshme të gjithë martirëve të lirisë,” përfundoi ajo.
