Ish-presidentja e Kosovës, Vjosa Osmani, ka reaguar pas ndarjes nga jeta të profesor Alush Gashi, duke e vlerësuar atë si një figurë të urtësisë, dijes dhe përbashkimit në Kosovë.
Osmani tha se profesor Gashi u nda nga jeta në një kohë kur, sipas saj, “shembulli i njeriut të dijes, të urtësisë e të përbashkimit na duhet më së shumti”.
Ajo e përshkroi të ndjerin si profesor të shquar të anatomisë dhe njeri të përkushtuar ndaj dijes, i cili bashkë me presidentin historik Ibrahim Rugova kontribuoi në ndërtimin e vizionit për shtetin e Kosovës.
“Nga Shtëpia e vogël e Lidhjes së Shkrimtarëve në Prishtinë e deri te Shtëpia e Bardhë në Washington, ai foli për Kosovën duke e gdhendur fjalën dhe skalitur mendimin”, shkroi Osmani.
Osmani shtoi se Alush Gashi do të kujtohet si diplomat në sjellje, i urtë në mendim dhe i fortë në qëndrime e aleanca.
Në fund, ajo u shprehu ngushëllime familjes Gashi, miqve dhe bashkëpunëtorëve të të ndjerit, duke thënë se kujtimi për të do të mbetet i përhershëm./teve1.info/
