Presidentja e Kosovës, Vjosa Osmani, pas takimit me ish-kryeministrin britanik, Tony Blair, e ka falënderuar atë në emër të popullit për kontributin për çlirimin e vendit.
Osmani tha se gjatë vitit 1999 Britania u radhit në anën e së drejtës dhe krah popullit të Kosovës në mënyrë që të jenë të lirë.
“Më lejoni të ju falënderoj përzemërsisht që jeni bashkë me ne në 25-vjetorin e çlirimit të Kosovë në mënyrë që ta shihni edhe ju mirënjohjen e qytetarëve tanë të cilët e kanë ndaj jush qysh nga viti 1999, kur u radhitët në anën e së drejtës dhe në anën e popullit të Kosovës për të qenë të lirë. Në vitin ’99 roli juaj si kryeministër britanik gjatë ndërhyrjes së NATO-s në Kosovë ishte vendimtar ndaj sikurse atëherë që ishit hero i popullit të Kosovës, si dhe hero i lirisë e i demokracisë edhe sot jeni hero i paqes për vendimin e drejtë të asaj kohe dhe gjithë përkrahjen që ia keni dhënë Kosovës gjatë këtyre 25 viteve”, tha Osmani.
Osmani ka përmendur faktin se shumë fëmijë të pasluftës e gëzojnë emrin e Tony Blair, duke i cilësuar si shenja të gjurmëve që ish-kryeministri ka lënë te populli.
“Shumë fëmijë të asaj kohe e mbajnë emrin tuaj, ata janë dëshmi se sa shumë gjurmë keni lënë te populli ynë. Ata po rriten sot krahas me Kosovën dhe krahas me kujtimin për njeriun që i dha shtytje lirisë tonë”./teve1.info/
