Presidentja e Kosovës, Vjosa Osmani, është shprehur e lumtur që në emër të Kosovës ka nënshkruar marrëveshje mirëkuptimi me nënsekretaren Amerikane, Eizabeth Allen, për t’i bashkuar forcat kundër manipulimit të informacionit nga shtetet e huaja.
Osmani ka falënderuar Allen për mbështetjen e ShBA-së ndaj Kosovës në çdo etapë të zhvillimit.
“Allen i shpreha mirënjohjen e popullit të Kosovës për mbështetjen e parezervë të Shteteve të Bashkuara për Republikën tonë në çdo etapë të zhvillimit të shtetit tonë e kjo mbështetje po vazhdon fuqishëm edhe sot. Jam jashtëzakonisht e lumtur që në emër të Republikës së Kosovës nënshkruam një marrëveshje së bashku me nënsekretaren Allen në mënyrë që të bashkojmë forcat kundër manipulimit të informacionit nga shtet e huaja”, kështu tha presidentja në deklarimin për media pas takimit me Allen, transmeton teve1.info.
Në kuadër të marrëveshjes, presidentja përmendi që nga sulmet kibernetike ka pësuar edhe Kosova si rezultat i ndikimit të Rusisë përmes rrugëve të Serbisë.
“Fatkeqësisht as Kosova nuk është kursyer nga këto sulme, të cilat sa vijnë dhe intensifikohen si rezultat i ndikimit të Rusisë në rajon nëpërmjet satelitit të saj, Serbisë. Kjo jo vetëm që është shqetësuese, por edhe paraqet rrezik aktiv për destabilizim të rajonit tonë. Marrëveshja e sotme mes Kosovës dhe ShBA-së është në këtë funksion. Ajo nuk përbën vetëm një tjetër marrëveshje, por është pikë kthese duke fuqizuar bashkëpunimin tonë në luftimin e manipulimit të informacionit”, tha presidentja.
