Ish-presidentja e vendit, Vjosa Osmani, ka kujtuar Kushtetutën e Kaçanikut, duke thënë se 7 shtatori shënon ditën kur vullneti për shtet u shndërrua në akt kushtetues.
Në një postim në rrjetin e saj social “Facebook”, ish-presidentja u shpreh se delegatët e Kuvendit, pavarësisht regjimit serb, miratuan Kushtetutën e Kaçanikut.
“Përballë regjimit serb që synonte ta mohonte ekzistencën tonë, delegatët e Kuvendit miratuan Kushtetutën e Kaçanikut dhe e shndërruan vullnetin për liri, demokraci e shtet në akt kushtetues.”, tha Osmani.
Teksa kujtoi Kushtetutën e miratuar, Osmani tha se delegatët krijuan mundësitë, duke mos pritur që historia t’ua krijonte ato.
“Ata nuk pritën që historia t’u krijonte mundësinë. Ata e krijuan historinë. Prandaj, Republika e Kosovës qëndron mbi themele të vendosura edhe atë ditë”, u shpreh më tej në postimin e saj ish-presidentja e vendit.
