Presidentja e Kosovës, Vjosa Osmani, ka deklaruar se është e bindur që dekreti për shpërndarjen e Kuvendit është në përputhje të plotë me Kushtetutën, ndonëse Gjykata Kushtetuese ka vendosur masë të përkohshme për pezullimin e tij.
Osmani, para publikimit të vendimit të Gjykatës Kushtetuese, tha se është konsultuar me dhjetëra juristë dhe se mirëpret çdo vendim të kësaj gjykate.
“Cilido që të jetë vendimi i Gjykatës në fund, për ne është i mirëseardhur. Është normale që institucionet të kenë interpretime të ndryshme. Aspak nuk kam frikë. E tëra që pres është që gjykata të vendosë në përputhje me parimin e integritetit dhe interpretimit të Kushtetutës në mënyrë të lirë”, ka deklaruar Osmani.
Ajo theksoi se, sipas bindjes së saj, dekreti është në përputhje të plotë me Kushtetutën, por shtoi se askush nuk është i pagabueshëm.
“Ne jemi të bindur që dekreti është në përputhje të plotë me Kushtetutën. Por unë nuk jam pejgamber që të mos bëj kurrë gabime. Prandaj ekziston Gjykata Kushtetuese”, ka thënë Osmani në një intervistë për Syri TV.
Presidentja shtoi gjithashtu se vendimi për dekretin është marrë duke u bazuar në interesin publik.
“Edhe për presidentë paraprakë, edhe për Kuvendin, edhe për këtë kryeministër, ka dhjetëra herë që është shkelur Kushtetuta. Përderisa unë jam e bindur, vetëm duke u bazuar në interesin publik e kam marrë këtë vendim”, ka deklaruar ajo.
