Presidentja e Kosovës, Vjosa Osmani, ka deklaruar në një intervistë për BBC se Kosova përfaqëson një shembull të qartë të një vendi që e njeh çmimin e paqes dhe rrugën drejt saj, duke rikujtuar periudhën e luftës dhe rolin vendimtar të aleatëve ndërkombëtarë.
Ajo theksoi se para 26 vjetësh Kosova ishte e shkatërruar nga lufta dhe se ndaj popullit të saj po kryhej gjenocid, derisa ndërhyrja ndërkombëtare, e udhëhequr nga Shtetet e Bashkuara të Amerikës me mbështetjen e Mbretërisë së Bashkuar dhe vendeve të tjera demokratike, shpëtoi jetët e qytetarëve të Kosovës.
“Kosovës iu dha një shans për paqe dhe për të jetuar e lirë”, tha Osmani, duke nënvizuar se sot vendi është sovran, demokratik dhe i pavarur.
Presidentja veçoi si arritjen më të madhe faktin që brezat e rinj janë të parët në historinë e Kosovës që nuk e kanë përjetuar luftën dhe po rriten në paqe. Ajo po ashtu përmendi angazhimin e saj në Bordin e Paqes të presidentit amerikan, Donald Trump, ku bën pjesë së bashku me liderë të tjerë botërorë.
