Duke folur për situatën në Ukrainë, Osmani tha se Letonia dhe Kosova do të vazhdojnë të kontribuojnë për të mbështetur paqen dhe stabilitetin.
“Shpreha dëshirën tonë të fortë për të ndërtuar një bashkëpunim të ngushtë në fushën e sigurisë dhe të mbrojtjes, por edhe në fushën e bashkëpunimit ekonomik, digjitalizimit e në fusha të tjera në dobi të dy popujve tanë. Vizita e presidentit Levits po ndodh në një kohë kur kontinenti ynë po ballafaqohet me një realitet të trishtë dhe Ukraina po ballafaqohet me një luftë të tmerrshme të nisur nga Rusia. Jam e bindur se si dy vende mike dhe partner të palëkundur, dy vendet tona do të vazhdojnë të kontribuojnë për të mbështetur paqen dhe stabilitetin në kontinentin tonë”, tha Osmani.
E para e shtetit theksoi se të dyja vendet ndajnë të njëjta synime dhe të njëjtin përkushtim për të ndërtuar një kontinent evropian më paqësor, më të bashkuar e më të sigurt.
Gjatë fjalës së saj, Osmani shtoi se nga presidenti letonez ka kërkuar mbështetjen për rrugëtimin e Kosovës drejt NATO-s dhe BE-së.
“Duke qenë se Letonia është një zë kyç në NATO dhe në BE, kam kërkuar mbështetjen e presidentit Levits në rrugëtimin tonë drejt integrimit euroatlantik dhe kam theksuar se këto aleanca duhet t’i kenë gjithnjë dyert e hapura për shtetet si Republika e Kosovës, duke treguar përkushtimin dhe plotësimin e kritereve për të qenë pjesë të saj. Jam e bindur se me qëndrueshmërinë e popullit të Kosovës si dhe me vendosmërinë tonë për të forcuar demokracinë dhe lirinë, së bashku do të sfidojmë seriozisht kërcënimet që na vijnë nga Rusia dhe aleati i saj, Serbia, e të cilat paraqesin rrezik real për rajonet tona dhe përtej”, tha Osmani. /Teve1.info/
