Presidentja e Kosovës, Vjosa Osmani, ka reaguar përmes një postimi në rrjetin social Facebook pas dorëzimit të kërkesës në Gjykatën Kushtetuese, për pezullimin e afatit 30-ditor për konstituimin e Kuvendit. Ajo theksoi se kërkesa synon të mbrojë rendin kushtetues dhe të parandalojë pasojat e pariparueshme për sistemin demokratik të vendit.
“Kërkesa e dorëzuar sot në Gjykatën Kushtetuese ka për qëllim mbrojtjen e rendit kushtetues të vendit nga pasojat e pariparueshme”, shkroi Osmani.
Presidentja u bëri thirrje partive politike që të tejkalojnë dallimet dhe të krijojnë sa më parë institucionet, në përputhje me vullnetin e qytetarëve dhe me Kushtetutën e vendit.
“Në këtë moment vendimtar për demokracinë dhe stabilitetin e Republikës sonë, i bëj sërish thirrje të gjitha subjekteve politike që t’u japin qytetarëve atë që u takon me Kushtetutë: një Kuvend funksional dhe institucione që punojnë në interes të tyre”, theksoi ajo.
Osmani e përshkroi kërkesën në Kushtetuese si një veprim kushtetues dhe moral, e jo si një zgjedhje politike.
“Kjo kërkesë para Gjykatës nuk është një zgjedhje politike, por një obligim kushtetues dhe moral ndaj popullit të Republikës së Kosovës, i cili ka votuar për të pasur institucione funksionale.”
Ajo përmbylli reagimin me mesazhin se interesi i vendit dhe Kushtetuta duhet të mbeten mbi çdo kalkulim politik.
“Interesi i vendit dhe Kushtetuta duhet të qëndrojnë mbi çdo llogari politike”, përfundoi Presidentja Osmani.
