Presidentja e vendit, Vjosa Osmani ka ngushëlluar Japoninë, pas tërmetit – që deri me tani raportohet për 50 viktima.
Osmani thotë se populli kosovar solidarizohet me atë japonez në këtë kohë të vështirë.
”Zemrat tona shkojnë për të gjitha komunitetet e prekura nga tërmeti shkatërrues në Japoni. I shprehim ngushëllimet tona të përzemërta familjeve që humbën të dashurit e tyre. Populli i Kosovës solidarizohet me popullin japonez në këtë kohë të vështirë”, ka shkruar Osmani.
Ndryshe, Japonia shpesh goditet nga tërmetet sepse gjendet përgjatë asaj që njihet si “Unaza e Zjarrit”, që është një hark vullkanesh dhe pllakash tektonike në Pellgun e Paqësorit.
Që nga 1 janari – kur ndodhi tërmeti i fuqishëm prej 7.6 shkallësh të Rihterit – Japonia është goditur nga rreth 100 dridhje të tjera pasuese të tokës.
