Janë bërë 33 seanca që votimi i fshehtë nuk po merr votat e mjaftueshme për të kaluar.
Ndonëse, Gjykata Kushtetuese doli me një vendim rreth këtij propozimi, në skenën politike pati paqartësi rreth tij.
E të premten, e para e shtetit tha se votimi i fshehtë lejohet, por duhet të ketë konsensus të deputetëve.
Presidentja Osmani deklaroi se këtë konstatim e ka bërë ekipi i saj ligjor.
“Konstatimi i ekipit tim ligjor me të cilin unë pajtohem është që në qoftë se lexohet në tërësi aktgjykimi votimi i fshehtë nuk përjashtohet si mundësi megjithatë për të kërkohet konsensusi i deputetëve. Kjo nënkupton që duhet të ketë votë, duhet të ketë vendim të seancës para se të shkohet te një mënyrë e tillë. Ky është interpretimi I ekipit tonë ligjor por nuk do të thotë që të tjerët pajtohen me të”, deklaroi Osmani.
Sipas saj, nëse Kuvendi i Kosovës nuk konstituohet brenda afatit të vendosur nga Gjykata Kushtetuese, do të ketë pasoja.
“Ajo çfarë e kam përmendur në këto takime dhe vazhdoj ta themë, është që kurd diçka është e detyrueshme në aspektin Kushtetues, kjo do të thotë që mos kryerja e këtij detyrimi nuk mbetët pa pasoja. Pra do të ketë pasoja juridike. Nuk është se ne mund të presim që gjykata të thotë mirë pas 30 ditësh vazhdoni njësoj takohuni çdo dy ditë dhe mos bëni asgjë. Nuk pres që do të ketë diçka të tillë. Unë do të planifikoj që në qoftë se nuk ka konstituim të Kuvendit shumë shpejt që t’i drejtohem Gjykatës me kërkesë për sqarim në lidhje me atë se çfarë pas 30 ditësh se duhet të sqarohet se cila është pasoja juridike e moskryerjes së detyrimit kushtetues të konstituimit të Kuvendit pas 30 ditësh, se duhet të ketë pasoja”, tha presidentja.
Pas takimeve që mbajti ditët e fundit, shefja e shtetit theksoi se partitë politike vazhdojnë të mos kenë qëndrime të njëjta.
Por sipas saj, kjo nuk do të thotë se nuk mund të gjendet një zgjidhje.
“Partitë politike ende i kanë qëndrimet diametralisht të kundërta por kjo nuk do të thotë që brenda këtij afati nuk do të ketë afrim, ka për disa gjëra që mund të ketë pajtim dhe unë do të shpresoja që mund të ketë sepse do të ishte bllokadë dhe lloji i votimit është me të vërtetë shumë jo racionale. Por tani siç e dini kemi dy ose tri lëndë të reja në Gjykatën Kushtetuese rreth mënyrës së votimit. Unë nuk e di nëse në këto lëndë është kërkuar masë e përkohshme që të mos ecë afati”, deklaroi ajo.
Këto deklarata, presidentja Osmani, i bëri gjatë ceremonisë së diplomimit të oficerëve të rinj të FSK-së.
