Presidentja e Kosovës, Vjosa Osmani, të hënën gjatë një takimi me të ngarkuarën me punë të ambasadës së Shteteve të Bashkuara të Amerikës në Kosovë, Anu Prattipati, ka diskutuar për situatën e sigurisë në Kosovë dhe në rajon.
Sipas Presidencës duke folur për situatën e sigurisë dhe zhvillimet në këtë sferë ajo ka theksuar tendencat e vazhdueshme të Serbisë për destabilizimin e Kosovës dhe të të gjithë rajonit përmes veprimeve të mirëkoordinuara me struktura ilegale dhe banda kriminale serbe.
Osmani po ashtu thuhet se ka diskutuar edhe për arrestimin e qytetarëve serbë në Gjakovë dhe në Prizren, të cilët pretendonin se ndodheshin në pelegrinazh.
“Porse, hetimet e deritashme kanë treguar se këto grupe kishin ndërlidhje me strukturat e inteligjencës ushtarake serbe si dhe me anëtarë të grupit terrorist të Banjskës”, thuhet në njoftim.
Më tej thuhet se presidentja ka theksuar se ky veprim është pjesë e një përpjekjeje të vazhdueshme nga Serbia për destabilizimin e Kosovës, përmes kërcënimeve dhe dhunës që sipas saj përbën një ndërhyrje të papranueshme në sovranitetin shtetëror të Republikës së Kosovës.
“Presidentja Osmani dënoi me vendosmëri këto veprime desabilizuese dhe të papranueshme, duke theksuar se Kosova nuk do të tolerojë asnjë ndërhyrje që rrezikon paqen, rendin kushtetues dhe sigurinë e të gjithë qytetarëve të saj, pa dallim përkatësie”, theksohet në njoftim.
Në njoftim thuhet edhe se Osmani me Prattipatin kanë diskutuar edhe rreth bashkëpunimit të vazhdueshëm me SHBA në këtë drejtim.
“Presidentja poashtu e njoftoi znj. Prattipati edhe për hapa të tjerë konkret që do të ndërmarrë, brenda kompetencave të saj kushtetuese, për ta thelluar aleancën strategjike me SHBA-të, dhe për ta mbrojtur interesin e Republikës së Kosovës”, bëhet e ditur në njoftim./teve1.info/
