Presidentja e Kosovës, Vjosa Osmani, ka qenë pjesëmarrëse dhe folëse në Samitin e Liderëve të Komunitetit Politik Evropian, që u mbajt në Kopenhagë, Danimarkë. E ulur në tryezë me liderë të rëndësishëm evropianë, përfshirë presidentin e Ukrainës, Volodymyr Zelensky, Osmani ka ngritur shqetësimin për veprimet destabilizuese të Serbisë në Ballkanin Perëndimor.
Në fjalën e saj gjatë diskutimeve të fokusuar në siguri, Presidentja Osmani theksoi rëndësinë që ka rajoni për sigurinë e përgjithshme të kontinentit.
“Në Samitin e Liderëve të EPC-së në Kopenhagë, në tryezën me liderë evropianë të fokusuar në temën e sigurisë, theksova se siguria e Evropës është e ndërlidhur ngushtë me sigurinë e Ballkanit Perëndimor,” ka shkruar Osmani në një postim në rrjetet sociale.
Ajo ka bërë thirrje që Bashkimi Evropian të jetë më aktiv në parandalimin e ndikimit destabilizues të Serbisë në rajon.
“Prandaj, Evropa duhet të përqendrojë vëmendjen e saj në këtë rajon, duke investuar në parandalimin e taktikave destabilizuese të Serbisë, si hap kyç për një siguri të qëndrueshme dhe afatgjatë,” ka theksuar ajo.
