Presidentja e Kosovës, Vjosa Osmani ka marrë pjesë në takimin e Fondit Global për Angazhim dhe Qëndrueshmëri të Komunitetit me ftesë Ministrit të Punëve të Jashtme të Gjermanisë, Johann Wadephul.
Osmani përmes një postimi në profilin e saj në Facebook tha se ka konfirmuar përkushtimin e palëkundër të Kosovës për të luftuar terrorizmin dhe ekstremizmin e dhunshëm.
“Me ftesë Ministrit të Punëve të Jashtme të Gjermanisë, Johann Wadephul, këtë javë në New York, mora pjesë në takimin e radhës së Fondit Global për Angazhim dhe Qëndrueshmëri të Komunitetit (GCERF) ku Kosova është vend partner nga viti 2017. Riafirmova përkushtimin e palëkundur të Kosovës për të luftuar terrorizmin dhe ekstremizmin e dhunshëm. Nga ndërtimi i sistemeve të paralajmërimit të hershëm, deri te përballja me radikalizimin online, Kosova është shndërruar në një model për rajonin – duke treguar se përmes bashkëpunimit, qëndrueshmërisë dhe vlerave të përbashkëta, edhe sfidat më të mëdha globale mund të tejkalohen”, ka shkruar Osmani.
Kujtojmë se Osmani ka udhëtuar në New York për të marrë pjesë në fillimin e punimeve të Asamblesë së Përgjithshme të Kombeve të Bashkuara.
