Pas themelimit të Bordit të Paqes presidentja e Kosovës, Vjosa Osmani ka reaguar duke thënë se anëtarësimi në organizata ndërkombëtare të paqes e që udhëhiqen nga aleati strategjik i Kosovës, fuqizon sovranitetin, pozicionin ndërkombëtar, si dhe është në interesin më të lartë të Republikës.
Në postimin e saj në Facebook, Osmani ka bërë të ditur se kjo marrëveshje historike do t’i dërgohet Kuvendit të Kosovës për ratifikim, në përputhje me kushtetutën e Kosovës, për të marrë miratimin final të përfaqësuesve të popullit
“Sot, në Davos, në emër të Republikës së Kosovës, kam nënshkruar Kartën e Bordit të Paqes si anëtare themeluese, e barabartë dhe me të drejta të plota, krah për krah me Shtetet e Bashkuara të Amerikës. Anëtarësimi në organizata ndërkombëtare të paqes e që udhëhiqen nga aleati ynë strategjik, fuqizon sovranitetin tonë, pozicionin tonë ndërkombëtar, si dhe është në interesin më të lartë të Republikës së Kosovës. Prandaj, kjo marrëveshje historike do t’i dërgohet Kuvendit të Kosovës për ratifikim, në përputhje me kushtetutën e Kosovës, për të marrë miratimin final të përfaqësuesve të popullit”, ka shkruar Osmani.
Ajo ka falënderuar presidentin amerikan, Donald Trump për lidershipin dhe ftesën që ta përfaqësojë Kosovën në këtë moment historik, duke nënvizuar se vendi do të jetë gjithmonë në shërbim të paqes./teve1.info/
Osmani nënshkruan anëtarësimin e Kosovës në Bordin e Paqes, përshëndetet me Trumpin
