Ish-presidentja Vjosa Osmani, e cila ishte bartëse e listës së Lidhjes Demokratike të Kosovës dhe kandidate e partisë për presidente ka deklaruar se Lëvizja Vetëvendosje nuk ka asnjë arsye për të refuzuar emrin e saj për postin e presidentes.
Ajo ka falënderuar qytetarët për mbështetjen në zgjedhjet e fundit, duke e cilësuar rezultatin si fillim të një faze të re për partinë.
“Ajo ka mijëra arsye të thotë ‘po’ dhe të gjitha ato janë për interesa të shtetit të Kosovës”, ka thënë Osmani në një konferencë për media, bashkë me kryetarin e LDK-së, Lumir Abdixhiku.
Sipas saj, angazhimi i partisë do të përqendrohet që nga dita e nesërme në ndërtimin e institucioneve funksionale dhe ofrimin e stabilitetit për vendin.
Me numërimin e mbi 97% të votave, LDK-ja ka arritur 17.68%, një rritje krahasuar me 13.2% në zgjedhjet e 28 dhjetorit 2025.
Osmani ka shtuar se vota e qytetarëve ka ndihmuar në ribalancimin e skenës politike dhe ka dërguar një mesazh të qartë kundër përçarjeve, duke e cilësuar këtë si një shenjë për të ardhmen politike të vendit.
“Ky është vetëm hapi i parë drejt ringritjes,” ka thënë Osmani, duke theksuar se LDK-ja do të vazhdojë të forcohet në muajt dhe vitet e ardhshme./teve1.info/
