Presidentja e Kosovës, Vjosa Osmani, është e bindur se Lëvizja Vetëvendosje dhe kandidati për kryeministër, Glauk Konjufca, kanë votat e nevojshme për formimin e qeverisë së re.
Në një konferencë për media pas mandatimit të Konjufcës për kryeministër, Osmani ka theksuar se është përgjegjësi e LVV-së dhe e kandidatit që të sigurojnë votat e nevojshme, jo e saj.
“Lëvizja Vetëvendosje dhe kandidati për kryeministër Glauk Konjufca kanë besim të plotë se mund të arrijnë votat e nevojshme, por kjo u takon atyre të sigurojnë votat. Unë kam detyrë të bindem se ata kanë gjasa, dhe më kanë bindur se e kanë këtë gjasë, ashtu siç kërkohet nga aktgjykimi i Gjykatës Kushtetuese, dhe e kam zbatuar këtë detyrim”, ka thënë Osmani.
Osmani ka shtuar se Kushtetuta dhe aktgjykimet e Gjykatës Kushtetuese nuk kërkojnë garanci, por vetëm gjasa, të cilat ajo i vlerëson në zyrën e saj, ndërsa garancia jepet në Kuvend përmes votave.
“Siç e kam thënë, askund në Kushtetutë dhe aktgjykimet e Gjykatës Kushtetuese nuk kërkohen garanci, por vetëm gjasa. Ka një dallim shumë të madh mes garancës dhe gjasave. Garancia jepet në Kuvend dhe për këtë arsye kërkohen votat atje, ndërsa gjasat ofrohen në zyrën time. Sikur të ishin dy apo më shumë kandidatë, detyrimi im do të ishte të paraqisja cili ka gjasat më të mëdha nga ata”, ka theksuar ajo./teve1,info/
