Presidentja e Republikës së Kosovës, Vjosa Osmani, ka mbajtur një fjalim në ceremoninë e ndërrimit të komandës së KFOR-it, e cila u mbajt sot në kampin “Film City” në Prishtinë. Ajo falënderoi të gjithë aleatët e Kosovës për kontributin shumëvjeçar në ruajtjen e paqes dhe sigurisë në vend, duke vlerësuar lart rolin e KFOR-it.
“Për më shumë se dy dekada, KFOR-i është aktori kryesor në ofrimin e sigurisë në Kosovë dhe në rajon,” tha Osmani.
Presidentja njoftoi se sapo ishte kthyer nga vizita në Danimarkë dhe Shtetet e Bashkuara të Amerikës, ku kishte falënderuar liderët e vendeve që kanë kontribuar me trupa në kuadër të misionit të NATO-s në Kosovë.
“Sapo u ktheva nga Danimarka dhe SHBA-të, ku falënderova liderët që kanë sjellë djemtë dhe vajzat e tyre për të shërbyer në Kosovë. Kosova gjithmonë do të jetë falënderuese,” deklaroi ajo.
Osmani theksoi lidhjen e fortë të qytetarëve të Kosovës me vlerat demokratike dhe paralajmëroi për kërcënimet që mund të rrezikojnë paqen dhe progresin e arritur.
“Qytetarët e Kosovës gjithmonë kanë qenë të lidhur me lirinë, demokracinë dhe sigurinë. Ka të tillë që duan të zhbëjnë atë që kemi arritur dhe të na kthejnë aty ku kemi qenë. Përgjigjja ndaj tyre duhet të jetë e fuqishme,” tha ajo, duke nënkuptuar kërcënimet autoritare dhe ndikimet destabilizuese në rajon.
Presidentja Osmani nënvizoi se paqja dhe stabiliteti kërkojnë qartësi, unitet dhe lidership të përgjegjshëm.
“Vetëm përmes konsistencës dhe qartësisë mund të ruajmë paqen. Sot, në rajon dhe më gjerë, këto parime janë nën sulm. Shohim sulme, por uniteti ynë duhet të jetë i palëkundur. Vetëm kur jemi të bashkuar, mund të ketë paqe në Evropë,” u shpreh ajo.
Ajo gjithashtu përshëndeti gjeneralmajorin italian Enrico Barduani, i cili po largohet nga posti i komandantit të KFOR-it, dhe mirëpriti pasardhësin e tij, gjeneralmajorin turk Özkan Ulutaş.
“Filozofia e lidershipit të gjeneral Barduanit ishte uniteti. Shumë herë kemi biseduar për sfidat dhe për atë që na priste përpara. Gjithmonë ka pasur respekt, dhe kjo është shenjë e partneritetit,” tha Osmani.
“Mirë se u kthyet, gjeneral Ulutaş. Mezi pres të bashkëpunojmë përsëri bashkë,” përfundoi ajo.
Ceremonia e ndërrimit të komandës së KFOR-it shënon një tranzicion të rëndësishëm në udhëheqjen e forcave paqeruajtëse në Kosovë, ku komandën nga gjenerali italian Enrico Barduani e mori gjeneralmajori turk Özkan Ulutaş.
