Presidentja e Kosovës, Vjosa Osmani, ka thënë se dhuna në baza gjinore në vend është fenomen jashtëzakonisht i dëmshëm për shoqërinë.
Ajo u ka bërë thirrje institucioneve të drejtësisë që të luftojnë këtë dukuri dh kryesit e këtyre veprave të dënohen sipas ligjeve në fuqi, duke kujtuar se ka pasur raste kur persona që kanë kryer kësi vepra janë liruar.
“Thirrje institucioneve të drejtësisë që ta luftojë patriarkatin, që të luftojë këto fenomene dhe t’i japin prioritet, duke dënuar ata që kryejnë këto vepra”, ka thënë Osmani në aktivitetin “ATO janë NE”, në sheshin e Prishtinës të hënën, në kuadër të aktiviteteve të fushatës globale “16 Ditët e Aktivizmit Kundër Dhunës me Bazë Gjinore”, përcjell teve1.info
Ajo tha se bashkë me Ministren e Drejtësisë, Albulena Haxhiu, janë duke punuar që ky fenomen të parandalohet.
“Për fat të keq në Kosovë ka pasur raste të shumtat të dhunës mbi baza gjinore dhe bashkë me ministren e Drejtësisë, Albulena Haxhiu kemi punuar për gjatë këtij viti që jo vetëm që të ashpërsohen dënimet ndaj atyre që kryejnë këto veprime por edhe të punojmë me të gjitha institucionet që ta parandalojmë”, tha Osmani.
Ajo tha se ka pasur shtetet që këtë fenomen e kanë parandaluar, duke përmendur Kanadanë dhe tha se do të ndjekin shembullin e këtij shteti.
Thirrje për dënime të ashpra ndaj këtyre rasteve pati edhe Ministrja e Drejtësisë, Albulena Haxhiu.
E ministrja e Arsimit, Arbërie Nagavci, tha se kanë shpërndarë broshura në shkolla të cilat sipas saj do t’u mundësojnë mësimdhënësve për të adresuar këto raste./teve1.info/