Në adresimin e saj vjetor, Presidentja e vendit Vjosa Osmani Sadriu ka folur rreth diskutimeve të cilat i ka pas me kryeministrin Albin Kurti rreth Draftit të Asocacionit të Komunave me shumicë serbe. Osmani tha se ka kërkuar diskutim me Shtetet e Bashkuara të Amerikës në mënyrë që kjo çështje të mos i lihet në dorë siç tha, emisarit të posaçëm për dialogun Kosovë –Serbi, Miroslav Lajcak dhe të tjerëve që nuk njohin pavarësinë e Kosovës.
Së bashku e të buzëqeshur hyjnë në sallën e Kuvendit.
Por kështu nuk u pa presidentja e Kosovës, Vjosa Osmani Sadriu, në fjalimin e saj vjetor para deputetëve të Kuvendit, ku PDK dhe AAK nuk morën pjesë ndryshe nga LDK-ja.
Presidentja e vendit ka goditur disa nga çështjet e ndjeshme politike, nisur nga raportet me aleatët e Kosovës, për të cilët tha se asnjëherë nuk i ka mirëkuptuar talljet që bëhen në llogari të tyre.
Osmani tha se nuk e ka kërkuar themelimin e Asociacionit, por ka kërkuar që drafti të diskutohet me SHBA-të sepse nuk do që t’i lihet në dorë njerëzve që vijnë nga shtete mosnjohëse e nuk besojnë pavarësinë e Kosovës.
“Kur unë kam propozuar që drafti i Asociacionit të fillohet të diskutohet, të diskutohet, me Shtetet e Bashkuara të Amerikës, në mënyrë që kjo çështje të mos i lihet në dorë as Lajcakut e as të tjerëve që nuk besojnë në Pavarësinë e Kosovës, kjo nuk ka nënkuptuar asnjëherë që unë kam kërkuar themeil të Asociacionit, por ka nënkuptuare që më shumë i kam besuar vetvetes sonë dhe Amerikës, se sa disa burokratëve nga shtetet jo njohëse”, tha Osmani.
Osmani deklaroi se më i rëndësishëm është nënshkrimi i presidentit të Shteteve të Bashkuara të Amerikës, se sa atij të Serbisë.
“ Thënë shumë troç, ajo që kam thënë është se. Më shumë se sa nënshkrimi i Presidentit të Serbisë, ka rëndësi nënshkrimi i Presidentit të Amerikës, shpresoj që jam mjaftueshëm e qartë”, u shpreh ajo.
Në fjalimin e saj, u tha se Serbia vazhdimisht po bashkëpunon me Kremlinin për të krijuar tensione.
“Përpjekjet e Serbisë dhe përkrahësve të saj në Kremlin për ta minuar stabilitetin e brendshëm, si dhe pozicionin ndërkombëtar të Kosovës sa vijnë e shtohen. E po kështu shtohet përkushtimi dhe mobilizimi ynë për t’i parandaluar ato. 24-shtatori i vitit 2023, mëngjesi fatal në Banjskë për shkak të aktit të agresionit të Serbisë ishte dëshmia më e qartë e kësaj”, tha Osmani
Në fund të fjalimit, shefja e shtetit kërkoi të shqyrtohet projekt buxheti për vitin 2025 nga ku tha se duhet më shumë buxhet për Forcën e Sigurisë së Kosovës që ushtarët të kenë më shumë dinjitet dhe ushqim.
