Kandidati i Lidhjes Demokratike të Kosovës (LDK) për kryetar të Fushë-Kosovës, Besnik Osmani, ka zhvilluar sot një takim me gratë e një prej lagjeve të qytetit, ku u diskutua për sfidat me të cilat përballen çdo ditë dhe për mundësitë e fuqizimit të tyre në shoqëri.
Në një bashkëbisedim të hapur, Osmani dëgjoi nga afër idetë e grave lidhur me punësimin, mbështetjen ekonomike dhe përfshirjen e tyre në proceset vendimmarrëse lokale.
Ai theksoi se barazia gjinore dhe fuqizimi ekonomik i grave janë ndër prioritetet kryesore të programit të tij qeverisës për Fushë-Kosovën:
“Fuqizimi i grave nuk është vetëm çështje sociale, por edhe zhvillimore. Gratë janë shtylla e çdo familjeje dhe e çdo komuniteti. Synimi ynë është që asnjë grua të mos mbetet pa mundësi për punë, trajnim apo pjesëmarrje aktive në jetën publike,” u shpreh Osmani.
Sipas tij, përmes politikave konkrete për zhvillim ekonomik, arsim profesional dhe përfshirje të barabartë në institucione, Fushë-Kosova mund të shndërrohet në një komunë më gjithëpërfshirëse dhe me më shumë mundësi për të gjithë qytetarët.
“Ne duam një Fushë-Kosovë ku zëri i grave dëgjohet, respektohet dhe bëhet pjesë e vendimmarrjes për të ardhmen e qytetit tonë,” përfundoi Osmani në një postim në Facebook.
