Kjo e premte i gjeti në Mynih të Gjermanisë.
Kjo pasi presidentja Vjosa Osmani, kryeministri Albin Kurti, e disa ministra të tjerë po marrin pjesë në Konferencën e Sigurisë.
E gjatë qëndrimit atje, dyshja takuan ndaras edhe emisarin e ri të Bashkimit Evropian, Peter Sorensen.
E para e shtetit bëri të ditur se temë diskutimi ishte dialogu Kosovë – Serbi.
Në anën tjetër, sipas Zyrës së Kryeministrit, Kurti i tha Sorensen se janë tri çështje që Serbia duhet t’i përmbushë.
“Për të ecur përpara nevojitet nënshkrimi i marrëveshjes, tërheqja e letrës së ish-kryeministres Bërnabiq dhe dorëzimi i kryeterroristit Millan Radoiçiq, për të cilin tashmë ka aktakuzë 160 faqëshe nga Prokuroria e Republikës së Kosovës. Kryeministri Kurti tha se është absurde që Presidenti i Serbisë ia imponon dorëheqjen kryeministrit të Serbisë, Millosh Vuçeviq, por nuk e dorëzon Radoiçiqin”, thuhet nga Qeveria e Republikës së Kosovës.
Pjesëmarrjen e Kosovës në këtë konferencë, po e sheh të rëndësishme, profesori i kriminalistikës, Fatmir Çollaku.
“Uroj që të dakordohen ose nëse mund të them të merren vendime të mëdha të dobishme në funksion të ruajtjes së paqes së qëndrueshme”, tha Çollaku.
E të enjten pjesë e konferencës së Sigurisë ishte edhe ministri i Punëve të Brendshme, Xhelal Sveçla i cili u tha përfaqësuesve të lartë të NATO-së se Serbia po vazhdon financimin e grupeve kriminale për ta sulmuar Kosovën.
Profesori Çollaku thotë se gjasat për tensione janë në veri janë minimale.
“Kjo temë ose kjo çështje mund të jetë në vazhdimësi permanente mund të jetë potenciale për t’u realizuar fatkeqësisht në kuptimin e skenarëve të ndryshëm nga ana e Serbisë, por gjithnjë e më pak ka gjasa reale në kuptimin e ndonjë trazire të madhe ose atakimi të sigurisë kombëtare tonën. Referencat e institucioneve të policisë dhe sigurisë kanë rezultuar që është e suksesshme në zmbrapsjen e çfardo sulmi”, tha ai.
Në margjinat e Konferencës së Sigurisë në Mynih, kryediplomatja Donika Gërvalla tha se Kosova është një shembull i suksesit demokratik në rajon.
