Presidentja e Kosovës, Vjosa Osmani, ka zhvilluar takim të rregullt me ambasadorin e Shteteve të Bashkuara, Jeffrey Hovenier me të cilin bisedoi për zhvillimet e fundit në vend, me fokus në çështjet e sigurisë, por edhe tema të tjera të interesit të përbashkët, thuhet nga Presidenca.
Në këtë takim u diskutuan edhe pritshmëritë nga debati për Kosovën në Këshillin e Sigurimit të OKB-së.
Në këtë takim, prezente ishte edhe drejtoresha e re e USAID-it, Eileen Devitt, të cilën Presidentja Osmani e uroi për pozitën e re.
“Ajo shprehu mirënjohje të thellë për mbështetjen e USAID-it dhe konfirmoi rëndësinë e projekteve të mbështetura nga USAID-i, të cilat kontribuojnë në përmirësimin e jetës dhe mirëqenies së qytetarëve. Presidentja Osmani konfirmoi gatishmërinë për vijim të bashkëpunimit të shkëlqyeshëm si deri me tash, duke vënë theksin tek mundësitë e zgjerimit të këtij bashkëpunimi gjithnjë e më shumë”, thuhet në komunikatë.
