Presidentja e vendit, Vjosa Osmani ka treguar gatishmëri që të ftojë liderët e partive për konsultime për konstituimin e Kuvendit.
Kështu ka bërë të ditur për Tëvë1 këshilltari i presidentes për media, Bekim Kupina, i cili tha se pas dështimeve të konstituimit të Kuvendit, Kosova rrezikon shtyllat e demokracisë.
“Qytetarët e Kosovës janë dëshmitarë të dështimeve të njëpasnjëshme, më saktësisht 13 herë, të Kuvendit për t’u konstituuar. Në një situatë të tillë, kur qytetarët shohin moskonstituimin e institucioneve si dhe pasojat e kësaj situate për shtetin e Kosovës, për ne është totalisht e pakuptimtë të flitet për “përmbajtje të ftesës””, ka thënë Presidenca.
Madje, Kupina thotë se nëse dikush e di që presidentja nuk bën ftesa kot janë ministri në detyrë Faton Peci dhe ministrja në detyrë Donika Gërvalla.
“Nëse është dikush në Kosovë që e di shumë mirë që Presidentja nuk bën ftesa kot e as nuk shkruan përmbajtje kot të ftesave, janë pikërisht z.Peci dhe znj.Gërvalla. Poashtu, nëse është dikush që e di fort mirë që Presidentja e njeh tepër mirë edhe Kushtetutën e vendit e edhe kompetencat e saj, janë pikërisht këta dy. Unë nuk e di nëse ata kanë folur në emër të Lëvizjes Vetëvendosje kur kanë paraqitur sot kushte të tilla, sepse siç e dini edhe ju, z.Kurti i përgjigjej pozitivisht edhe ftesave të Presidentit Thaçi e edhe ftesave të Presidentes Jahjaga (kur kemi pasur një situatë të ngjashme në vitin 2014), prandaj mospërgjigja në ftesën e Presidentes Osmani në një situatë kur vendi po përballet me një bllokadë të rëndë nga e cila pësojnë qytetarët, do të ishte e paprecedentë”, tha ai.
Ndërkohë, ai shtoi se ftesa do të jetë për takim, e nuk do të ketë “filozofi”.
“Ftesa do të jetë ftesë për takim, pra nuk do të ketë ndonjë filozofi aty. Nuk është koha për hipokrizi por për të treguar nivelin më të lartë të përgjegjësisë shtetërore, sepse qytetarët meritojnë seriozitet maksimal për tema të interesit nacional”, ka thënë ndër të tjera Kupina./teve1.info/
