Presidentja e vendit, Vjosa Osmani gjatë vizitës në Islandë ka zhvilluar takim me presidentin e këtij vendi, Gudni Thorlacius Johannesson, me të cilin ka biseduar për marrëdhëniet midis dy vendeve.
Osmani ka thënë se nga presidenti i Islandës ka kërkuar që të vazhdojë mbështetjen për Kosovën edhe në avancimin e anëtarësimit në Këshillin e Evropës.
“Diskutuam marrëdhëniet tona të mira ndërshtetërore dhe gatishmërinë e përbashkët për t’i thelluar ato. Në diskutim me presidentin Jóhannesson, kërkova që mbështetja e palëkundur e Islandës për Kosovën të vazhdojë edhe në avancimin e anëtarësimit të Kosovës në Këshillin e Evropës, përgjatë presidencës islandeze”, ka shkruar ajo në një postim në Facebook.
Sipas saj, Kosova dhe Islanda ndajnë të njëjtin vizion për një Evropë paqësore.
“Dy vendet tona janë lidere në mbrojtjen dhe promovimin e të drejtave të njeriut dhe ndajnë vizionin e njëjtë për një Evropë paqësore, të sigurt dhe demokratike”, ka përfunduar Osmani. /Teve1.info/