Presidentja e Kosovës, Vjosa Osmani, të hënën ka pritur në takim Shefin e Zyrës së Bashkimit Evropian në Kosovë, Aivo Orav, me të cilin ka diskutuar rreth situatës aktuale politike në vend dhe zhvillimeve të fundit.
Sipas Presidencës, në fokus të takimit ishte çështja e konstituimit të Kuvendit të Kosovës, hapat e mëtejmë, ndikimi i moskonstituimit në proceset e rëndësishme për vendin, si dhe në raportet me Bashkimin Evropian.
Osmani dhe Orav thuhet se gjithashtu diskutuan për një sërë çështjesh që ndërlidhen me raportet ndërmjet Kosovës dhe BE-së, ku Presidentja ka ritheksuar rëndësinë e heqjes së plotë të masave të padrejta ende në fuqi, si dhe të trajtimit të aplikacionit të Kosovës për marrjen e statusit të vendit kandidat.
