Të martën, për rrugën e Kosovës në NATO u fol në Serbi.
Ambasadori amerikan atje, Christopher Hill, tha se aktualisht Serbia është më pranë aleancës ushtarake perëndimore sesa Kosova, duke theksuar se NATO-ja punon çdo ditë me ushtrinë serbe, mban trajnime dhe ushtrime.
Kësaj deklarate nga Prishtina i është kundërpërgjigjur, shefja e shtetit, Vjosa Osmani.
“Ekziston vetëm një shtet që është më larg NATO-s se Serbia, e ai shtet është Rusia e Putinit. Një shtet si Serbia, që vazhdimisht ka shkelur vlerat kryesore mbi të cilat qëndron NATO, mbrojtjen nga forcat autoritare, mbrojtjen nga shtetet që shkelin rregullat bazike të së drejtës ndërkombëtare, lëre më që është larg NATO-s, por as që mund të ëndërrojë një ditë të jetë pjesë e NATO-s” ka thënë ajo.
Osmani tha se Serbia është edhe kundër vlerave të NATO-s sikur Rusia dhe kjo është arsyeja që sipas saj nuk ka gatishmëri për anëtarësim në aleancë.
“Kushdo që e konsideron Serbinë si shtet që është afër NATO-s, nuk e ofendon vetëm çdo shtet demokratik që po bën hapa konkretë drejt anëtarësimit në NATO, por njëkohësisht është duke i ofenduar edhe viktimat e Serbisë së Millosheviqit, e cila është njëjtë sot, siç ka qenë edhe para disa dekadave”, ka thënë Osmani.
Për deklaratën e ambasadorit Hill në Serbi, të mërkurën foli edhe ambasadori amerikan në Kosovë, Jeffry Hovenier.
“Dua të përgënjeshtroj ata që duan të bëjnë krahasime se kush qëndron ku në raport me NATO-n”, ka thënë ai.
Në Kosovë, aktualisht janë mbi 4 mijë e 700 trupa të KFOR-it, përfshirë edhe forcën rezervë.
