Presidentja e Kosovës, Vjosa Osmani, të martën ka pritur në takim komandantin e KFOR-it, gjeneralmajor, Enrico Barduani, ku ka vlerësuar rolin e KFOR-it në ruajtjen e sigurisë dhe paqes në Kosovë.
Sipas Presidencës, Osmani gjatë takimit ka nënvizuar se stabiliteti në Kosovë është faktor kyç për sigurinë e të gjithë rajonit për çka ka thënë se angazhimi i përbashkët me KFOR-in dhe NATO-n mbetet thelbësor.
“Presidentja Osmani po ashtu theksoi se kontinenti ynë po përballet me një situatë të ndërlikuar gjeopolitike, e cila kërkon bashkëpunim të ngushtë dhe koordinim të përhershëm me aleatët tanë”, thuhet në njoftim.
Në takim gjithashtu thuhet se është diskutuar për koordinimin e aktiviteteve në prag të vizitës së paralajmëruar të sekretarit të Përgjithshëm të NATO-s, Mark Rutte në Kosovë./teve1.info/
