Presidentja e Kosovës, Vjosa Osmani, pritet që sot t’i dërgojë Gjykatës Kushtetuese komentet e saj lidhur me procesin e konstituimit të Kuvendit, i cili tashmë është zvarritur.
Lajmin e ka konfirmuar këshilltari për media i Presidencës, Bekim Kupina, i cili nuk ka dhënë detaje mbi përmbajtjen e dokumentit.
Ai theksoi se qëndrimi i Osmanit mbetet i pandryshuar: askush nuk mund të ketë të drejtë të bllokojë funksionimin e institucioneve shtetërore.
“Siç e dini, Gjykata Kushtetuese tashmë ka vendosur masë të përkohshme deri më 30 shtator. Në lidhje me meritat e rastit, Presidentja do t’ia dorëzojë Gjykatës Kushtetuese komentet e saj për çështjen në fjalë brenda afatit të përcaktuar nga Gjykata, pra nesër më 9 shtator. Qëndrimi i Presidentes gjithnjë ka qenë se askush nuk duhet ta ketë të drejtën t’i bllokojë institucionet, e rrjedhimisht shtetin. Ashtu siç parashihet në 57 (4) të Kushtetutës, realizimi i të drejtave të komuniteteve është i pandashëm nga detyrimi për t’i respektuar ligjet e Republikës së Kosovës dhe për të mos i cenuar të drejtat e të tjerëve”, deklaroi Kupina.
