Presidentja e Kosovës, Vjosa Osmani, ka konfirmuar se zgjedhjet e jashtëzakonshme parlamentare do të mbahen më 28 dhjetor, duke e cilësuar këtë datë si më të përshtatshmen për procesin zgjedhor.
Në një konferencë për media, Osmani bëri të ditur se vendimi për shpërndarjen e Kuvendit u mor pas dështimit të tij për të zgjedhur Qeverinë dhe për të miratuar çështje me rëndësi urgjente.
“Para se ta nënshkruaj dekretin për shpërndarje, kam bërë përpjekjen e fundit që partitë të rikthehen në Kuvend për të miratuar zgjatjet buxhetore, në mënyrë që as pagat e qytetarëve tanë dhe as funksionimi i shtetit të mos bllokohen. Po ashtu, në rend dite ishte edhe pakoja presidenciale prej pesë marrëveshjesh ndërkombëtare në vlerë prej 1 miliard euro dhe çështje të tjera të rëndësishme, për të cilat kisha shpresuar për vullnet politik,” tha Osmani.
Ajo theksoi se pavarësisht bazës kushtetuese që lejonte vazhdimin e punës së Kuvendit, mungesa e vullnetit politik e bëri të pamundur miratimin e marrëveshjeve dhe të vendimeve të nevojshme.
“Ka ekzistuar baza kushtetuese e qartë që edhe pas dështimit të mandatarit të dytë, Kuvendi të mblidhej dhe të merrte vendime. Në mungesë të vullnetit politik, nuk kishte zgjidhje tjetër përveçse të nënshkruaja dekretin për shpërndarje. Është për keqardhje që nuk u arrit dakordim, jo për shkak të marrëveshjeve, por për mungesë vullneti,” deklaroi ajo.
Osmani theksoi se marrëveshjet që nuk u ratifikuan përfshinin mbështetje financiare për fëmijët, spitalet, bizneset, fermerët dhe kategori të tjera, ndërsa mosvotimi i tyre, sipas saj, dëmton qytetarët, jo partitë politike.
Duke folur për pasojat e mosveprimit institucional, Osmani paralajmëroi se humbja e fondeve ndërkombëtare dobëson pozitën e Kosovës.
“Një shtet që humb fondet e BE-së dhe Bankës Botërore humb edhe besimin e partnerëve. Një Kosovë e dobësuar është humbje për të gjithë. Thirrja ime për partitë është të zhvillojnë një fushatë dinjitoze dhe pas rezultateve të marrin përgjegjësinë që u takon,” tha ajo.
Presidentja konfirmoi gjithashtu se data 11 janar është përjashtuar si mundësi për mbajtjen e zgjedhjeve, duke e lënë 28 dhjetorin si datën më funksionale për institucionet dhe për organizimin nga KQZ.
