Presidentja e Kosovës, Vjosa Osmani, në një deklaratë para mediave ndërkombëtare pas nënshkrimit të Kartës së Bordit të Paqes, u shpreh se Kosova ndihet e privilegjuar të jetë pjesë e kësaj iniciative ndërkombëtare, duke qëndruar krah për krah me Shtetet e Bashkuara të Amerikës.
Osmani theksoi se Bordi i Paqes synon të ndihmojë vendet anë e kënd botës të arrijnë paqen, duke e bërë procesin më të drejtpërdrejtë dhe më të efektshëm sesa mekanizmat e tjerë ndërkombëtarë, si OKB-ja.
“Besoj fuqishëm në lidershipin e presidentit Trump dhe ekipit të tij. Kjo është për të shpëtuar jetë. [Paqja] nuk është gjithmonë e lehtë për ta arritur, por mund të mundësohet me bashkimin e të gjithëve”, tha Osmani para gazetarëve.
Kosova u bë anëtare e Bordit të Paqes të enjten, në iniciativën e presidentit amerikan Donald Trump, duke u bërë pjesë e një platforme globale për promovimin e paqes dhe stabilitetit. /teve1.info/
