Presidentja e Kosovës, Vjosa Osmani, në seancën solemne kushtuar 25-vjetorit të Betejës së Koshares, tha se në këtë ditë duhet nderuar guximi dhe përkushtimi i vajzave dhe djemve të Ushtrisë Çlirimtare të Kosovës, të cilën kanë dëshmuar guximin e paepur për lirinë e vendit.
Teksa përmendi dëshmorët e rënë në këtë betejë, Osmani tha se ata tani qëndrojnë në vetë themelet e Republikës së Kosovës.
“Sot jemi këtu për të nderuar guximin dhe përkushtimin e vajzave dhe djemve të Ushtrisë Çlirimtare të Kosovës, e që të cilët dëshmuan shpirtin dhe guximin e paepur për lirinë tonë. Sikurse edhe në shumë kapituj të historisë sonë të luftës, guximi, sakrifica dhe vendosmëria përmblidhen edhe në Betejën e Koshares. Filozofia e mbrojtjes së pragut të shtëpisë, gradualisht u transformua në një nevojë të domosdoshme për mbrojtje të përgjithshme të shtëpisë sonë të përbashkët, Kosovës. Në betejën e Koshares ranë për liri edhe 111 dëshmorë të tjerë, të cilët sot qëndrojnë në vetë themelet e Republikës së Kosovës”, deklaroi Osmani para deputetëve në Kuvend.
Më tej, Osmani theksoi se Beteja e Koshares njëkohësisht shpërfaq qëndrueshmërinë e luftëtarëve të Kosovës, duke thënë se personifikon edhe stoicizmin e luftës çlirimtare.
E pa përmendur nuk la edhe mbështetjen e aleatëve kryesorë të Kosovës, NATO-n dhe Shtetet e Bashkuara të Amerikës
“Përkrahë aleatëve tanë, NATO-s, në krye me Shtetet e Bashkuara të Amerikës, luftëtarët tanë përmbushën misionin për ta bërë Kosovën të lirë. Pra, Beteja e Koshares shpërfaq qëndrueshmërinë e jashtëzakonshme të luftëtarëve tanë të lirisë. Ajo nuk është vetëm një kapitull në historinë e Kosovës, por është vetë personifikimi i stoicizmit të luftës tonë çlirimtare”, theksoi tutje Osmani.
Ka nisur seanca solemne në nderim të Betejës së Koshares, e cila filloi me himnin shtetëror dhe atë kombëtar me një minutë heshtje për të rënët e kësaj beteje.
