Presidentja e Kosovës, Vjosa Osmani ka thënë se arrestimi i ish-policit të Kosovës, Arbnor Spahiu nga Serbia është i pabazuar.
Osmani ka thënë se arrestimi i Spahiut nuk ka të bëjë me sundimin e ligjit.
Ajo në një reagim në Facebook ka thënë se Serbia duhet të ndalë fushatën e saj të arrestimeve politike të qytetarëve të Kosovës.
“I tillë është edhe arrestimi i qytetarit të Kosovës, Arbnor Spahiu, mbi baza dhe akuza tërësisht të rreme. Ky akt nuk ka të bëjë me sundimin e ligjit, por me vazhdimësinë e praktikave të vjetra të një regjimi që refuzon të përballet me të kaluarën dhe që keqpërdor ligjin për të kërcënuar qytetarët tanë. Serbia duhet të ndalë menjëherë fushatën e saj të arrestimeve politike kundër qytetarëve të Kosovës dhe të mbahet përgjegjëse ndërkombëtarisht për veprimet e saj arbitrare. Këto veprime jo vetëm që pengojnë lirinë e lëvizjes, por edhe rrezikojnë çdo përpjekje për dialog e normalizim të marrëdhënieve”, ka shkruar Osmani.
Ajo ka thënë se ka kontaktuar me Zyren Ndërlidhëse të Republikës së Kosovës në Beograd si dhe ka kërkuar reagim nga shtetet e Quint-it dhe Misionit të BE-së, në mënyrë që këto shkelje të të drejtave të njeriut nga ana e Serbisë të mos injorohen.
Presidentja ju ka bërë thirrje qytetarëve që shmangin kalimin nëpër Serbi.
