Në një postim në Facebook, Osmani ka thënë se gjatë takimit ka shprehur përkushtimin e Kosovës për ta vazhduar bashkëpunimin dhe koordinimin me partnerët, shkruan teve1.info
Sipas saj, angazhimi i Kosovës në dialog është i bazuar në mbrojtjen e sovranitetit.
“Kosova është palë konstruktive, e përgatitur dhe e angazhuar në procesin e dialogut të përqëndruar në njohjen e ndërsjellë. Në takimin me të dërguarit e posaçëm Lajçak dhe Escobar shpreha përkushtimin e Kosovës për ta vazhduar bashkëpunimin dhe koordinimin me partnerët tanë, duke potencuar se angazhimi i vendit tonë në dialog është i bazuar në mbrojtjen e sovranitetit, rendit kushtetues dhe integritetit territorial të Kosovës, të cilat janë të paprekshme”, ka shkruar ajo.
Tutje, presidentja Osmani ka theksuar se “Kosova asnjëherë nuk ka kontribuar në tensione dhe është angazhuar vazhdimisht për paqe dhe stabilitet si dhe për zgjidhje evropiane. Vendi ynë është i ndërtuar mbi parimin e një shoqërie multietnike ku të gjithë kanë të drejta të barabarta, pa dallim etnie”.
Vizita e emisarit të ShBA-së dhe atij të BE-së në Kosovë vjen pas dështimit të arritjes së ndonjë marrëveshjeje në Bruksel mes Kosovës dhe Serbisë më 18 gusht dhe para datës 1 shtator, kur do të fillojë zbatimi i vendimeve të Qeverisë së Kosovës për targat dhe dokumentet e Serbisë. /Teve1.info/
