Avokati, Kadri Osaj vlerëson se krerët e UÇK-së gjatë luftës i janë përmbajtur rregullave të saj.
Duke folur për gjykimin që nisi sot, Osaj thotë se Prokuroria i është referuar një prove që është nxjerrë me shkelje procedurale e që ka të bëjë me bastisjen e shtëpisë së Jakup Krasniqit, pasi që është konfirmuar aktakuza.
“Prezantimi i Prokurorisë i referohet një prove që është nxjerr me shkelje procedural për faktin se Prokuroria i ka përfunduar hetimet, është ngrit aktakuza dhe është konfirmuar dhe ka bërë bastisje në shtëpinë e Jakup Krasniqit dhe të gjitha provave që iu referuan deri në atë moment, iu referuan provave të nxjerrura në shtëpinë e Jakup Krasniqit. Për mendimin tim kjo bastisje është bërë me shkelje procedurale ngase në momentin kur është nxjerr Ligji për Dhomat e Specializuara në mënyrë decidive është parapa që Gjykata dhe Prokuroria janë të obliguar t’i respektojnë konventat ndërkombëtare, Kushtetutën, posaçërisht kapitullin e 2, nenin 22 dhe 55 dhe standardet të inkorporohen në sistemin tonë të drejtësisë”, ka thënë Osaj.
Sipas Osajt në këtë rast është cenuar paprekshmëria e pronës çka rrjedhimisht i bën provat e papranueshme.
“Në kuadër të kësaj drejtësie janë inkorporu dispozita ligjore ku nuk lejojnë cenimin e paprekshmërisë së banesës dhe pronës. Në rastin konkret është cenu paprekshmëria e pronës dhe banesës. Kështu që këto prova konsideroj që janë prova të papranueshme. Ato janë nxjerrë pas konfirmimit të aktakuzës kur është bë bastisja në shtëpinë e Jakup Krasniqit. Hetimet fillojnë me aktvendim mbi fillimin e hetimeve, mbarojnë me aktvendim mbi pushimin e hetimeve ose mbi përfundimin e hetimeve”, tha ai.
Sipas tij, nëse ndonjëri prej avokatëve ka dhënë leje për bastisje pas konfirmimit të aktakuzës ka bërë gabim të madh.
“Nëse ka pushim të hetimeve lirohen nga dyshimet, nëse ka aktvendim mbi përfundimin e hetimeve për nëjë përiudhë të shkurtër ngritet aktakuza për një kohë të shkurtë dhe ajo shkon në rrjedhën e vet të konfirmimit që për mendimin tem është edhe një shkelje sepse kur konfirmohet aktakuza, para se ajo të konfirmohet sipas legjislacionit tonë i jepet mundësia mbrojtjes ta kundërshtojnë aktakuzën. Sipas Ligjit për Dhomat, pas konfirmimit të aktauzës është bë bastisja në shtëpinë e Jakupt Krasniqit. Nëse ndonjëri prej avokatëve ka dhënë leje për bastisje e nuk ka bë kundërshtim, ky do të ishte një gabim i madh”, ka shtuar ai.