Deputetja e Lëvizjes Vetëvendosje, Fatmire Kollçaku, është propozuar si kandidate për presidente të Kosovës.
Propozimi është bërë përmes një shkresë zyrtare që i është dërguar Kryesisë së Kuvendit të Kosovës nga shefja e grupit parlamentar të VV-së, Arbërie Nagavci, në emër të deputetëve nënshkrues.
Letra është publikuar nga deputeti i Lidhja Demokratike e Kosovës, Besian Mustafa.
Në dokument thuhet se, në përputhje me dispozitat kushtetuese dhe ligjore të vendit, deputetët nënshkrues kanë propozuar Kollçakun si kandidate për postin e presidentes. Sipas shkresës, bashkë me nominimin janë dorëzuar edhe lista e nënshkrimeve të deputetëve si dhe dokumentacioni tjetër i nevojshëm për procedurën.
“Deputetët nënshkrues nominojnë znj. Fatmire Mulhaxha Kollçaku si kandidate për Presidente të Republikës së Kosovës. Bashkëngjitur me këtë shkresë gjeni listën e nënshkrimeve të deputetëve dhe dokumentacionin tjetër të nevojshëm. Ju lusim që, në përputhje me procedurat e paracaktuara, të procedoni këtë nominim”, thuhet në shkresë.
