Në mbledhjen e djeshme të Senatit të Universitetit të Prishtinës (UP) është konfirmuar gjetja e Këshillit të Etikës e cila i shpallë plagjiatorë Bujar Dugollin dhe Ardian Kastratin. Kështu thotë Rron Gjinovci nga Organizata për Rritjen e Cilësisë në Arsim (ORCA).
Gjinovci thotë se ajo që mbetet shqetësuese është “ndëshkimi qesharak për dy plagjiatorët”, teksa i ka kërkuar ministres së Arsimit, Arbërie Nagavci që të reagojë, përcjell teve1.info
“Kosova mund të jetë vendi i vetëm në botë, në të cilin kur institucionet shpallin dikë plagjiator, ai vazhdon punën me ndëshkim qesharak si mosmentorim i temave të masterit dhe doktoratave për një kohë të caktuar. ORCA do të angazhohet që kjo të mos mbetet kështu, prandaj i kërkojmë reagim Ministres së Arsimit znj. Arbërie Nagavci e cila ka premtuar publikisht se nuk do të ketë tolerancë për plagjiaturën, që të luajë rolin e saj si garantuese e zbatimit të ligjeve në fuqi që lidhen me arsimin, në atë mënyrë që plagjiatura të ndëshkohet në mënyrë meritore”, ka shkruar ai në Facebook.
Në të kaluarën, ORCA ka mbajtur disa aksione simbolike rreth “profesorëve plagjiatorë”. Ata përveç që kanë kërkuar përjashtimin e Dugollit dhe Kastratit nga Universiteti i Prishtinës, kanë kërkuar që t’u hiqet edhe titulli akademik. /Teve1.info/
