Sipas njofitmit për medie, të hënën,në mbledhjen e Senatit të UP-së, ku ndër pikat e rendit të ditës u diskutua vendimi i Këshillit të Etikës mbi shpalljen plagjiator të Ardian Kastratit dhe Bujar Dugollit, ky i fundit e pranoi fajësinë mbi plagjiaturën e bërë.
“Dugolli u shpreh se gabimi i vetëm i tij për të cilin ndjehet fajtor është se ka pranuar që emri i tij të vendoset në punimin që përmban plagjiaturë. Këtë veprim ai tentoi ta justifikojë përmes mirëbesimit që e ka pasur në kolegun e tij Ardian Kastratin dhe se nuk e ka shikuar punën e bërë në punim.
Gjithsesi, Dugolli duke tentuar ta shfajësojë vetën, e inkriminon edhe më shumë atë. Ai pranon haptazi para Senatit të Universitetit të Prishtinës se përmes veprimit të tij ai ka kontrabanduar punime shkencore me qëllim të avancimit, pra duke vendosur emrin në një punë akademike për të cilën nuk ka asnjë pikë kontributi në të”, thuhet në komunikatë.
Megjithatë, sipas njoftimit publik të dërguar nga ORCA, pavarësisht këtij deklarimi të hapur para senatorëve dhe menaxhmentit të UP-së, Senati, sipas ORCA-s, nuk guxoi të merrte vendim që t’i përjashtojë nga universiteti dy profesorët.
“Tendenca për relativizim të situatës aktuale nga disa dekanë që mbahen për intelektualë në shoqërinë tonë dhe që mbajnë ligjërata publike për etikën, krizën tonë shoqërore e politike apo për ligjshmërinë e jetës tonë publike ishte neveritëse deri në padurim, saqë monitoruesit e ORCA-s u detyruan ta lëshojnë monitorimin”, thuhet në komunikatë.
