Shefi i Zyrës së BE-së në Kosovë, Avio Orav, ka përsëritur thirrjen e përfaqësuesit të lartë të Bashkimit Evropian, Josep Borrell, i cili ka dënuar ashpër sulmin terrorist në kanalin e ujit të Ibër Lepencit.
Pas takimit me kryeministrin Albin Kurti, Orav tha se thirrja e Borrellit ishte e qartë, dhe se bashkë me komunitetin ndërkombëtar u njoftuan me zhvillimet e fundit mbi sulmin e të premtes mbrëma.
“Patëm një takim me kryeministrin Kurti dhe komunitetin ndërkombëtar. Kryeministri pati mundësinë të na informojë për zhvillimet e së premtes mbrëma. Nga ana e Bashkimit Evropian, Borrelli ka bërë një thirrje të qartë që nuk do ta përsëris sepse dihet tashmë”, tha Orav në konferencë.
Ndërsa, ambasadori amerikan Jeff Hovenier ka thënë se ShBA-ja nuk është në pozitë që të thotë se kush qëndron pas sulmit terrorist në kanalin e ujit të Ibër Lepencit në Zubin Potok.
Kjo pasi sipas tij është ende herët dhe kërkojnë hetime më të kujdesshme.
I pyetur se a qëndron Serbia mbrapa këtij sulmi, Hovenier tha se nuk janë në pozicion për të përjashtuar asnjë grup të caktuar politik dhe asnjë shtet.
“SHBA nuk është në pozitë të thotë se kush qëndron pas sulmit, është herët këto kërkojnë hetim më të kujdesshëm. Çfarë mund të them është se u ofrojmë mbështetjen tonë autoriteteteve të Kosovës, besojmë se duhet të bëhet një hetim i detajuar për të identifikuar përgjegjësit. Çfarë mund të them është se në këtë pikë nuk mund të themi kush është përgjegjës por gjithashtu nuk jemi në pozicion për të përjashtuar asnjë grup të caktuar politik, asnjë shtet, është shumë herët por nuk e dimë akoma” ka deklaruar ai pas takimit me kryeministrin, Albin Kurti./teve1.info/
Hovenier: Në këtë pikë SHBA-ja s’është në gjendje të thotë kush qëndron prapa sulmit në Ibër-Lepenc
