Reperi i njohur Mozzik është bërë pjesë e një skandali pas sekuestrimit të një ore luksoze “Richard Mille” nga Dogana e Kosovës, të cilën ai e kishte prezantuar në rrjete sociale si dhuratë për ditëlindjen e tij.
Dogana e Kosovës reagoi duke njoftuar se gjatë kontrollit në Kanalin e Gjelbër janë zbuluar dhe ndaluar përkohësisht dy orë të pa deklaruara nga një udhëtar, një “Richard Mille” dhe një “Rolex”, me vlerë totale 1.340.027,50 euro.
“Janë zbuluar dhe ndaluar përkohësisht dy orë luksoze, të cilat nuk ishin deklaruar nga një udhëtar gjatë kalimit në Kanalin e Gjelbër”, thuhej në reagimin e Doganës.
Por pas verifikimeve rezultoi se ora që u prezantua si “Richard Mille” ishte e rreme. Këtë e bëri të ditur shoqëria e avokatëve “Vokshi&Lata”, që përfaqëson ligjërisht kompaninë zvicerane “Richard Mille”.
“Ora e ndaluar në Doganën e Kosovës nuk është origjinale Richard Mille”, thuhet në reagim. Avokatët bënë të ditur se pas verifikimit zyrtar të kryer nga kompania “Richard Mille” është konfirmuar se ora është falsifikat dhe se rezultatet tashmë janë komunikuar me Doganën e Kosovës. “Rezultati është komunikuar tashmë zyrtarisht me Doganën e Kosovës dhe procedurat ligjore do të vazhdojnë”, theksohet në reagim.
