I mori mbi 5% të votave në zgjedhjet e 28 dhjetorit.
Por, kaq mjaftuan që Aleanca për Ardhmërinë e Kosovës, të jetë pjesë edhe e legjislaturës së ardhshme.
E lideri i saj, Ramush Haradinaj, u bë opozitari i parë që mbrëmjen e së dielës doli para gazetarëve.
Madje, ftoi partinë e dytë dhe të tretën për bashkëpunim.
“Për të pasur qeveri Kosova tani duhet të presim edhe një marrëveshje mes LDK-së dhe PDK-së, për shkak se e dimë që bllokada është shkaktuar një vit nga Kurti dhe Vetëvendosje. Por, po ashtu nuk kemi parë një gatishmëri të këtyre dy partive për një marrëveshje dhe për këtë për të thjeshtëzuar kush është kryeministri. Aleanca nuk ka qitur kushte dhe nuk qet kushte për opozitën, por tani është momenti që të reflektojmë të gjithë, të mos e votojmë vendin”, tha kreu i AAK-së, Ramush Haradinaj.
Por, për një përgjigje nga LDK, Haradinajt i duhet të pres.
Kjo meqë lideri i Lidhjes Demokratike të Kosovës, po e konsideron dorëheqjen.
Partia e udhëhequr nga Lumir Abdixhiku, sërish u rendit e treta.
“Duke marrë përgjegjësinë, ditëve në vijim do ta thërras Kuvendin e LDK-së dhe para tij do t’i shpalosim e shqyrtojmë të gjitha çështjet dhe përgjegjësit që mbaj si kryetar”, deklaroi ai.
E subjekti i vetëm që nuk doli në konferencë të dielën pas mbylljes së vendvotimeve, ishte Partia Demokratike e Kosovës.
Për një konferencë, u desh të kalonin mbi 12 orë.
Vetëm paraditen e së hënës, Bedri Hamza, tha se priti rezultat më të mirë se 21% të votave.
Ndërsa paralajmëroi edhe proces të brendshëm zgjedhor.
“PDK shpejt do të futet në proces të brendshëm zgjedhor, nuk ka pasur që një kohë të gjatë zgjedhje prej vitit 2019. Dhe do të fillon prej bazës, prej nëndegëve duke i përfshirë të gjitha nivelet deri në zgjedhjen e gjitha organeve të partisë, sepse realisht është një kohë e gjatë dhe kanë nevojë që të kemi një reformë edhe të moshës edhe të gjinive edhe të profesioneve dhe gjithçka tjetër”, tha kryetari i PDK-së.
Ndryshe, sipas rezultateve preliminare, Lëvizja Vetëvendosje, mori 49.30% të votave.
