Pas vizitave në Prishtinë dhe Beograd, ndërmjetësi i dialogut Miroslav Lajçak i ka bindur palët që të kthehen sërish në tryezën e bisedimeve në Bruksel.
Kryeministri i Kosovës, Albin Kurti dhe presidenti i Serbisë, Aleksandar Vuçiq, e kanë konfirmuar se të mërkurën do ta takohen ne kryeqendrën evropiane për ta vazhduar dialogun e nivelit të lartë.
Zëdhënësi i qeverisë së Kosovës, Përparim Kryeziu, ka treguar për çka do të bisedohet më 26 qershor në Bruksel.
“Në fokus kryesor ky takim do të ketë zbatimin e marrëveshjes bazike dhe aneksit të saj, dhe rrugën përpara”, ka thënë Kryeziu.
Por anëtarja e kryesisë nga radhët e Lidhjes Demokratike të Kosovës, Besa Gaxherri, nuk pret diçka konkrete nga ky takim.
“Unë personalisht nuk pres asgjë të re nga ky takim, duke e pasur parasysh se jemi në vit zgjedhor dhe z.Kurti po shfrytëzon çdo moment për poena politik. Kurti po shkon në Bruksel për shkak të presionit të madh që po i bëhet nga Bashkimi Evropian dhe Shtetet e Bashkuara të Amerikës”, ka thënë Gaxherri.
Ndërkaq kryetari i grupit parlamentar nga radhët e Partisë Demokratike të Kosovës, Abelard Tahiri, thotë se në dialog do të diskutohet për ato tema që sipas tij i ka prodhuar vetë kryeministri Kurti.
“Këtu nuk mund të presim që do të dal diçka jashtë këtyre temave që i ka prodhu Kurti në dialog. Normalisht unë nuk di për agjendën, unë nuk di për mënyrën se si është organizu, por ajo çka mund ta vlerësojë që komplet angazhimi në këtë takim të radhës do të jetë në temat që i ka prodhu Kurti këto dy vite e gjysmë”, ka thënë Tahiri.
Kritik ndaj kryeministrit Kurti u shpreh edhe deputeti tjetër nga radhët e LDK-së, Armend Zemaj.
“Ka vend për shqetësim sepse gjithë ky proces i përcjellur me mostransparencë dhe ikje nga përgjegjësia para të zgjedhurve të popullit ku ekziston një rezolutë në fuqi që Qeveria duhet të raportojë para dhe pas çdo raundi të bisedimeve është tregues i qartë në atë që kemi pas vëretje në vazhdimësi. Vet vizita e heshtur ose tentimi që të heshtet vizita e Lajçakut është prodhim i takimit Kurti-Vuçiq, ku i bëjmë thirrje qeverisë që të jetë e përgjegjshme në atë që do të bëj tutje më marrëveshjet e përkrahura nga partnerët ndërkombëtar”, tha Zemaj.
Ndërkaq deputeti i Lëvizjes Vetëvendosje, Armend Muja, tha se ka ardhur koha që të definohet nëse me të vërtetë ka një marrëveshje mes Kosovës dhe Serbisë, sepse sipas tij kjo e fundit ka vazhduar të jetë destruktive në raport me shtetin më të ri në Evropë.
Gjatë qëndrimit në Prishtinë, i dërguari i Bashkimit Evropian për dialogun Kosovë-Serbi, Miroslav Lajçak, ka thënë se dy vendet duhet të bëjnë hapa për të zbatuar Marrëveshjen për normalizim të marrëdhënieve, të arritur në shkurt të vitit të kaluar.
